സൈക്കിൾ ഗിയർ കളികൾ ഇനി വേറെ ലെവലിൽ

രണ്ട് ദിവസം ലോക്ക് ഡൗൺ അതിൽ ഒരു വിഷമവും ഇല്ല , മനുഷ്യർ ഒരു കോവിഡ് ലക്ഷണവുമില്ലാതെ കുഴഞ്ഞു വീണു മരിക്കുന്നു.... സ്വയം ഒതുങ്ങിയിരിക്കാം..... ചിലരോട് എത്ര പറഞ്ഞാലും മനസിലാവില്ല ! ഒരു സമ്പൂർണ ലോക്ഡൗൺ വന്നാൽ കുറച്ചെങ്കിലും നമുക്ക് കോവിഡിനെ നിയന്ത്രണ വിധേയമാക്കാം ....

എന്തായാലും സൈക്കിളിനെക്കുറിച്ച് എന്തെങ്കിലും ഷെയർ ചെയ്യണ്ടേ!

ഗിയർ സൈക്കളിനെ കുറിച്ചാവട്ടെ ഇന്നത്തെ എഴുത്ത്.ലോകത്ത് നിരവധി സൈക്കിൾ കമ്പനികളുണ്ടെങ്കിലും ഒന്ന് രണ്ട് കമ്പനികൾ മാത്രമാണ് നല്ല ഗിയർ സിസ്റ്റം ഇറക്കാറുള്ളൂ. ഷിമാനോ ആണ് ഇതിൽ കേമൻ പിന്നെ മൈക്രോ ഷിഫ്റ്റ് എന്ന കമ്പനിയും ഉണ്ട്. മിക്ക സൈക്കിൾ കമ്പനികളും ഇവരുടെ ഗിയർ സിസ്റ്റം ആയിരിക്കും ഉപയോഗിക്കുന്നത്.

സൈക്കളിൻ്റെ വിലകൂടുന്നതിൽ ഈ ഗിയർ സിസ്റ്റത്തിനും വലിയ പങ്ക് ഉണ്ട്. ഗിയറുകളുടെ എണ്ണം കൂടുതലുള്ള സൈക്കിളിന് വിലയും കൂടും.ഷിമാനോ കമ്പനി തന്നെ വ്യത്യസ്ഥ മോഡലിലുള്ള ഗിയർ സിസ്റ്റം ഇറക്കുന്നുണ്ട്, അസേര / ആൾട്ടിസ്   എന്നിവ ഇവയിൽ ചിലതാണ്. ഗിയർ സിസ്റ്റത്തിൻ്റെ മേൻമ കൂടുന്നതിനനുസരിച്ച് വിലയും കൂടും.കൂടാതെ ഗിയർ ഷിഫ്റ്റിൻ്റെ സ്മൂത്ത് കൂടും- ഷിഫ്റ്റ് ചെയ്യുന്ന സമയവും കുറയും. നിങ്ങൾ ഗിയർ സൈക്കിൾ വാങ്ങുന്നതെങ്കിൽ ഇത് എന്തായാലും ശ്രദ്ധിക്കണം. 

ഗിയർ സിസ്റ്റം രണ്ട് തരത്തിൽ ഉണ്ട് വീലിൻ്റെ ഭാഗത്ത് മാത്രമുള്ളതും - പെടലിൻ്റെയും വീലിൻ്റെയും ഭാഗത്ത് ഉള്ളവയും ഉണ്ട്.

പെടലിൻ്റെ ഭാഗത്ത് ഒരു ഗിയർ മുതൽ മൂന്നു ഗിയർ വരെ ഉണ്ടാകാറുള്ളൂ വീലിൻ്റെ ഭാഗത്ത്  ഏഴു മുതൽ പതിനൊന്ന് ഗിയർ വരെ ഉള്ളവ വരെ ഉണ്ട്.

ഇതിനനുസരിച്ചാണ് സൈക്കിളിൻ്റെ സ്പീഡ് പറയുന്നത്.  21 സ്പീഡ് ഗിയർ എന്നാൽ മുന്നിൽ (പെടലിൽ) മൂന്നു ഗിയറും പിന്നിൽ വീലിൽ ഏഴു ഗിയറും ആയിരിക്കും.

മുന്നിൽ ഗിയർ ഉള്ളവയിൽ ആയാസത്തിൽ സവാരി ചെയ്യാം.

കയറ്റം കയറാൻ എല്ലാം സുഗമമായിരിക്കും.

ഗിയർ ഷിഫ്റ്റിങ്ങ്, അതുപോലെ ഗിയർ കോമ്പിനേഷൻ കൃത്യമായില്ലെങ്കിൽ ഇവ പെട്ടെന്ന് തകരാറിലാവാൻ സാധ്യതയുണ്ട്.

ചില കാര്യങ്ങൾ ശ്രദ്ധിച്ചാൽ ഈ പ്രശ്നം പരിഹരിക്കാം.

സൈക്കിൾ നിർത്തിയിട്ടിരിക്കുമ്പോൾ വെറുതെ ഗിയർ മാറ്റരുത് .അതു പോലെ സൈക്കളിൽ പോകുമ്പോൾ പെടൽ ചവിട്ടാതെ ഇരിക്കുമ്പോഴും,പെടൽ വേഗത്തിൽ / ടൈറ്റായി ചവിട്ടുമ്പോഴും ഗിയർ മാറ്റരുത് -ഇത് ചെയിൻ തെറ്റുന്നതിനും - പല്ലുകൾ ചെയിൻ എന്നിവ തകരാറിലാവാൻ കാരണമാകും.

ഒരു 21 സ്പീഡ് സൈക്കളിൽ

മുന്നിൽ മൂന്ന് ഗിയർ അഥവാ മൂന്ന് ചെയിൻ വീൽ ഉണ്ടാകും, ഇതിൻ്റെ നിയന്ത്രണം ഹാൻഡലിൻ്റ ഇടതുഭാഗത്തുള്ള ഷിഫ്റ്ററിൽ ആയിരിക്കും,  അതുപോലെ പുറകിൽ ഏഴ് വീൽ ഗിയർ ( കസറ്റ് ) ഉണ്ടാകും ഇതിൻ്റെ നിയന്ത്രണം ഹാൻഡലിൻ്റ വലത് ഭാഗത്തുള്ള ഷിഫ്റ്ററിൽ ആയിരിക്കും.

ഹാൻഡലിലെ ഷിഫ്റ്ററുകളിൽൽ ഗിയർ കൂട്ടാനും കുറനുമുള്ള സംവിധാനം ഉണ്ട് അതിൽ ഗിയറിൻ്റെ നമ്പറും കാണിച്ചു തരും.

മോട്ടോർ വാഹനങ്ങളിൽ ഗിയർ മാറ്റുന്നതു പോലെ ഗിയർ കോമ്പിനേഷൻ ഓരോ റോഡിൻ്റെ പ്രതലത്തിനനുസരിച്ച് മാറ്റണം.

മുന്നിലെ മൂന്ന് ഗിയർവീലിൽ ഓന്നമത്തെ ഗിയർവീൽ ചെറുതും മൂന്നാമത്തേത്  ഏറ്റവും വലുതും ആയിരിക്കും.

പുറകിലെ ഏഴു ഗിയർ വീലിൽ ഒന്നാമത്തേത് വലുതും ഏഴാമത്തേത് ചെറുതുമായിരിക്കും.

 ഇവയുടെ കോമ്പിനേഷൻ ശ്രദ്ധിച്ചാൽ സുഗമമായി സൈക്കിൾ ചവിട്ടാം 

മൂന്ന് പ്രധാന കോമ്പിനേഷനാണ് ഞാൻ ശ്രദ്ധിക്കാറുള്ളത് .

1.  മുന്നിൽ ഗിയർ 1 എങ്കിൽ പുറകിൽ 1,2,3 ഗിയർ വരെ ഇടുന്നതാണ് ഉചിതം (1-1 / 1-2 / 1-3 )

2 . മുന്നിൽ ഗിയർ 2 ഇട്ടാൽ പുറകിൽ 3, 4, 5 വരെ ഇടാം (2-3 / 2-4 / 2-5 )

3. മുന്നിൽ 3 എന്ന ഗിയറിലാണെങ്കിൽ പുറകിൽ 5,6,7 വരെ ഇടാം (3-5 / 3-6 / 3-7 )

കയറ്റം കയറുമ്പോൾ മുന്നിൽ ഒന്നാം ഗിയറിൽ ഇട്ട് അതിനനുസരിച്ചുള്ള പുറകിലെ ഗിയറിലേക്ക് മാറ്റാം, വേഗതയിൽ പോകാൻ മൂന്നാം ഗിയറും ഉപയോഗിക്കുന്നതാണ് നല്ലത്.

കൃത്യമായ കോമ്പിനേഷൻ അല്ലെങ്കിൽ ചെയിൻ ചെരിഞ്ഞായിരിക്കും  മുന്നിലെയും പിന്നിലെയും ഗിയർ മാറ്റുന്ന ഡിറൈലറിലൂടെ കറങ്ങി കടന്നുപോകുന്നത് . ഇത് ചെയിൻ /ഡിറൈലർ എന്നിവ തകരാറിലാവാൻ കാരണമാകും.

പല സുഹൃത്തുക്കളിൽ നിന്നും ,ഇൻറർനെറ്റ് ,യൂടൂബ് എന്നിവയിൽ നിന്നുമുള്ള അറിവ് വെച്ചാണ് ഞാൻ ഇതൊക്കെ മനസിലാക്കിയത്. തെറ്റുകൾ ഉണ്ടെങ്കിൽ തീർച്ചയായും കമൻറ് ചെയ്യണം.

......സിംരാജ്......