മുനിയാട്ടുകുന്ന്

നമ്മുടെ ചുറ്റുപാടിൽ മറഞ്ഞു കിടക്കുന്ന നിരവധി മനോഹരമായ പ്രദേശങ്ങൾ ഉണ്ട്. അത്തരം പ്രകൃതി സുന്ദരമായ, ചരിത്രപ്രധാന്യമുള്ള സ്ഥലങ്ങളിലൂടെ യാത്ര ചെയ്യാം.

 

പലരും നമ്മുടെ ചുറ്റുപാടിലെ ഇത്തരം മനോഹരമായകാഴ്ചകളെ ശ്രദ്ധിക്കാതെ മറ്റു സംസ്ഥാനത്തെ വിനോദസഞ്ചാര മേഖലകളിലേക്ക് ഓടി നടക്കുന്നു.

ത്രിശൂർ ജില്ലയിൽ ആമ്പല്ലൂരിൽ നിന്ന് ചിമ്മിനി ഡാം റോഡിൽ 10 കിലോമീറ്റർ സഞ്ചരിച്ചാൽ എത്തിച്ചേരുന്ന ' മുപ്ലിയം എന്ന ഗ്രാമത്തിലാണ് മുനിയാട്ടുകുന്ന് സ്ഥിതി ചെയുന്നത്.

ത്രിശൂർ ജില്ലയിലെ ഉയരം കൂടിയ സ്ഥലങ്ങളിൽ ഒന്നാണ് മുനിയാട്ടുകുന്ന്. ഇതിന് മുകളിൽ നിന്നാൽ ജൈവവൈവിദ്ധ്യങ്ങളാൽ സമ്പന്നമായ ചിമ്മിനി കാടുകളും _മുളക്കാടുകളും  കുറുമാലിപ്പുഴയുടെയുടെ ഭാഗങ്ങളും കാണാം. ചിമ്മിനി ഡാമിലേക്ക് പോകുന്ന സഞ്ചാരികൾക്ക് സന്ദർശിക്കാവുന്ന ഒരു സ്ഥലം കൂടിയാണിത്. മയിലുകൾ ഉൾപ്പെടെ നിരവധി പക്ഷികളുടെയും സങ്കേതമാണിവിടം.

ശിലായുഗത്തിൻ്റെ അവിശേഷിപ്പുകളായ മുനിയറകൾ ഇവിടെ കാണാവുന്നതാണ്. പുരാവസ്തു വകുപ്പിൻ്റെ രേഖകൾ പ്രകാരം ഇവിടെ 12 മുനിയകൾ ഉണ്ടായിരുന്നു. മനുഷ്യൻ്റ ചൂഷണങ്ങളുടെ ഭാഗമായി പലതും നശിച്ചു. നിലവിൽ ഒരു മുനിയറ മാത്രമാണ് ഇവിടെ നിലനിൽക്കുന്നത് ഏകദേശം 12 അടിയോളം നീളമുള്ള കരിങ്കൽ പാളികൾ കൊണ്ട് നിർമ്മിച്ച  മുനിയറകളിലാണ് പൗരാണിക കാലത്ത് മുനിമാർ താമസിച്ചിരുന്നുവെന്ന് കരുതുന്നു.

പശ്ചിമഘട്ടത്തിൻ്റെ ഭാഗമാണ് ഈ പ്രദേശം. സംസ്ഥാന വനംവകുപ്പിൻ്റെ ചാലക്കുടി ഡിവിഷനിൻ്റെ ഭാഗമായ മുനിയിട്ടുകുന്നിനെ ചുറ്റുമുള്ള പാറകെട്ടുകൾ ഒരു കോട്ട പോലെ  സംരക്ഷിച്ചു നിൽക്കുന്നു. 

നമ്മൾ സംരക്ഷിക്കേണ്ട ഇത്തരം ചരിത്രപ്രാധാന്യമുള്ള സ്ഥലങ്ങൾ സംരക്ഷിക്കപ്പെടാതെ ക്വാറി ഖനനം മൂലവും ,മനുഷ്യരുടെ ചൂഷണം മൂലവും നശിച്ചു കൊണ്ടിരിക്കുന്നു.

ആയിരക്കണക്കിന് വർഷം പഴക്കമുള്ള ഇനിയുള്ള ഒരു  മുനിയറയെങ്കിലും ഭാവിതലമുറക്ക് വേണ്ടി സംരക്ഷിക്കപ്പെടണം.

പ്രകൃതിയെ നശിപ്പിക്കാത്ത ചൂഷണം ചെയ്യാത്ത യാത്രകളാവാം!

...സിംരാജ്...