രണ്ടു ദിവസത്തിനു ശേഷം ഇന്ന് വീണ്ടും സൈക്കിൾ സവാരി തുടങ്ങി - കൂടെ പ്ലസ് ടു കാല സുഹൃത്ത് ടിജോയും ഉണ്ട്. യാത്ര ചൂണ്ടൽ - പഴുന്നാന പുതിയ റോഡ് - പാറന്നൂർ ചിറ വഴിയായിരുന്നു. ഇടക്ക് വെച്ച് ടിജോ വീട്ടിലേക്ക് തിരിച്ചു ഞാൻ മുന്നോട്ട് പോയി..
ഞാൻ പാറന്നൂർ ചിറയിൽ എത്തി കുറച്ച് നേരം വിശ്രമിച്ചു ....നല്ല ശാന്ത സുന്ദരമായ സ്ഥലം വിശ്രമിക്കാനായി നല്ല സിമൻ്റ് ബെഞ്ചുകളും ഒരുക്കിയിട്ടുണ്ട് .ചിറയിൽ വെള്ളത്തിൻ്റെ ഒഴുക്ക് തീരെ ഇല്ല.തടയിണ ഉള്ളതിനാൽ വെള്ളം മറുവശത്ത് തടഞ്ഞു നിൽക്കുന്നുണ്ട്. വ്യത്യസതതരത്തിലുള്ള പക്ഷികളെ അവിടെ കാണാം, രാവിലെ ഇരതേടി ഇറങ്ങിയ അവർ മരച്ചില്ലകളിൽ ചാടിക്കളിച്ചും വെള്ളത്തിൽ കുളിച്ചും പറന്നു നടക്കുന്നു .
ചിറയിലെ വെള്ളത്തിലേക്കിറങ്ങാൻ പടവുകൾ ഉണ്ട് .ഒരു ചേട്ടൻ അവിടെ നിന്ന് പശുവിനെ കുളിപ്പിക്കുന്നുണ്ട്, കഴിഞ്ഞ തവണ വന്നപ്പോഴും ആ ചേട്ടൻ പശുവിനെ കുളിപ്പിക്കുന്ന കാഴ്ച കണ്ടിരുന്നു. ചിലർ ബൈക്കിൽ വന്ന് അവിടെ വ്യായാമം ചെയുന്നത് കണ്ടു. ഞാനും ചുമ്മ ചില സ്ട്രെച്ചിങ്ങ് ചെയ്തു, ചെറിയ പണിയും കിട്ടി. ചെറുതായി ഒരു മസിൽ പെയിൻ കുറച്ച് നേരം കൂടി വിശ്രമിച്ചു.
അടുത്തുള്ള പള്ളിയിൽ നിന്നും കുർബാന കഴിഞ്ഞ് ചിലർ നടന്നു പോകുന്നുണ്ട്.
ശുദ്ധവായു ശ്വസിച്ചു കൊണ്ട് കുറച്ച് നേരം ചിറയുടെ തീരത്തുള്ള നടപ്പാതയിലൂടെ നടന്നപ്പോൾ - ഓക്സിജൻ കിട്ടാതെ ശ്വാസകോശം തകർന്നു കഴിഞ്ഞ ദിവസങ്ങളിൽ മരണമടഞ്ഞ നമ്മുടെ സുഹൃത്തുക്കളെ ഓർത്തു.കൂടെ കഴിഞ്ഞ ദിവസം നേപ്പാളിൽ വെച്ച് മരണമടഞ്ഞ ലിമ്പിനേയും . എല്ലാം സഹിക്കാനുള്ള ശക്തി ഈശ്വരൻ അവരുടെ കുടുബത്തിനു നൽകട്ടെ.
തിരിച്ചു പോകുന്ന വഴി ബഥനി ആശ്രമത്തിൽ കയറി അച്ചനുമായി ഇത്തിരി കുശലാന്വേഷണം നടത്തി. കാലിലെ മസിൽ പെയിൻമാറാൻ അച്ചൻ്റെ വക കുറച്ച് പൊടികൈകൾ ചെയ്തു തന്നു.
വീട്ടിലേക്ക് പോരുന്ന വഴി കോടതിപ്പടി മുനിസിപ്പൽ കോർട്ടേഴ്സിനടുത്ത് റോഡിൽ നിറയെ ഞാവൽ പഴം കിടക്കുന്നു - ഇപ്പോ ഇതൊന്നും ആർക്കും വേണ്ടെ ,അധികം ആളുകൾ പോകാത്ത വഴി ആയതു കൊണ്ടായിരിക്കും.സൈക്കിൾ റോഡരികിൽ നിർത്തി - അടുത്ത പറമ്പിൽ നിന്ന് പൊടിയന ഇല പൊട്ടിച്ചു കുമ്പിളാക്കി അതിലേക്ക് ഞാവൽ പഴം പെറുക്കി ഇട്ടു , ഇനി വീട്ടിലേക്ക്
Comments
Post a Comment