ആവേശപ്പുറത്ത് ഒറ്റ ദിവസം കൊണ്ട് ഇരുനൂറ് കിലോമീറ്റർ റൈഡ്.

-------------------------------------------------------

പലരും ആവേശപ്പുറത്ത്  തുടങ്ങിയ  യാത്രകൾ പാതിവഴിയിൽ ഉപേക്ഷിച്ച കഥകൾ കേട്ടിട്ടുണ്ട് .അത്യാവശ്യം പരിശീലനമില്ലാതെ ഒരു ദീർഘദൂര യാത്ര പരാജയമായിരിക്കും! ചെറിയ ദൂരങ്ങൾ ചവിട്ടി ശീലിച്ച ശേഷം മാത്രം ദീർഘമായ ലക്ഷ്യങ്ങളെക്കുറിച്ച് ചിന്തിക്കാം.

വ്യക്തമായ പ്ലാനിങ്ങ് ഇല്ലാതെ ഒരു യാത്രയും നടത്തരുത്. ദിവസവും ഒരു രണ്ട്‌ മണിക്കൂർ വീതം നിശ്ചിത ദൂരം സൈക്കിൾ ചവിട്ടി പരിശീലിക്കാം. ശരാശരി 15 മുതൽ 25 വരെ കിലോമീറ്റർ വേഗത എനിക്ക്  MTB- യിൽ ലഭിക്കുന്നുണ്ട്. ഹൈബ്രിഡ്, റോഡ് ബൈക്ക് മോഡലുകളിലാണ് കൂടുതൽ വേഗത ലഭിക്കുക. 

വേഗത കൂടുമ്പോൾ സുരക്ഷയെ കുറിച്ച് മറക്കരുത് - ഹെൽമെറ്റ് ,കാൽ - കൈമുട്ടിൽ ഇടാനുള്ള പാഡുകൾ, ഗൗസുകൾ, ഷൂ തുടങ്ങിയ എല്ലാ റൈഡിങ്ങ്‌ ഗിയേഴ്സ് ഉപയോഗിക്കുന്നത് നല്ലതാണ്.

 ലഗേജുകൾ പരമാവധി കുറക്കുന്നതാണ് നല്ലത്. കരിയറിലെ ബാഗിൽ ലഗേജുകൾ ഉറപ്പിച്ചു വെക്കാം. ഭാരം കൂടിയാൽ സൈക്കിൾ ചവിട്ടാനും ബുദ്ധിമുട്ടാവും.

വിശ്രമിച്ചുകൊണ്ടുള്ള യാത്രയാണ് എപ്പോഴും നല്ലത് - അത് നിങ്ങൾക്ക് തുടർന്നും നല്ല ശരാശരിയിൽ സൈക്കിൾ ചവിട്ടാൻ സാധിക്കും. വിശ്രമിക്കുന്ന സമയത്ത് നന്നായി വെള്ളം / ഉപ്പും പഞ്ചസാരയും ഇട്ട നാരങ്ങ വെള്ളം  കുടിക്കുക. കരിക്ക് വെള്ളം നല്ലതാണ്

വായുവിൻ്റെ ഘർഷണം കുറക്കുന്ന രീതിയിൽ ടൈറ്റായുളള വസ്ത്രങ്ങൾ ധരിച്ചാൽ കൂടുതൽ വേഗത ലഭിക്കും.

രാവിലെ നേരത്തെ സൈക്കിൾ സവാരി തുടങ്ങാം ,വെയിലിന് ചൂടേറുന്ന സമയങ്ങൾ വിശ്രമിച്ച് - വെയിൽ കുറയുന്ന സമയങ്ങളിൽ പരമാവധി ദൂരം സവാരി ചെയ്യാം. 

ഓരോ രണ്ട് മണിക്കൂറിലും 15 മിനിറ്റ് വിശ്രമം നല്ലതാണ് - ഒരു ദിവസം പരമാവധി 200 km യാത്ര ചെയ്യുന്നതാണ് നല്ലത്.

പരമാവധി ചിലവ് കുറച്ച് യാത്ര ചെയ്യാൻ ശീലിക്കണം. ശരീരത്തിന് വേണ്ട ഭക്ഷണം മാത്രം കഴിക്കുക .സൈക്ലിങ്ങിന് ഇടയിൽ കൂടുതൽ ഭക്ഷണം കഴിക്കരുത്.

രാവിലെ 4 മുതൽ ഒരു 11:30 സൈക്കിൾ ചവിട്ടാം. ഉച്ചക്ക് വിശ്രമിച്ച ശേഷം 2:30 മുതൽ 6 :30 വരെയും സൈക്കിൾ ചവിട്ടാം, കൂടുതൽ വൈകാതെ തന്നെ രാത്രി വിശ്രമിക്കാനുള്ള സ്ഥലം കണ്ടെത്തണം.

ഇരുട്ടുള്ള സമയങ്ങളിൽ ലൈറ്റ് മുന്നിലും പുറകിലും ഉണ്ടാകണം -റി ഫ്ലക്ടിങ്ങ് ബാൻഡ് ധരിക്കുന്നതും മറ്റു വാഹനക്കാർക്ക് എളുപ്പത്തിൽ നമ്മെ തിരിച്ചറിയുന്നതിന് സഹായിക്കും.

മുകളിൽ പറഞ്ഞ കാര്യങ്ങളിൽ പല കാര്യങ്ങളും  ശ്രദ്ധിക്കാതെ - ഞാൻ രാവിലെ 4:30 ന് ഇറങ്ങി - ആറര മണിക്കൂർ കൊണ്ട് വലിയ ബുദ്ധിമുട്ട് ഇല്ലാതെ  പാലക്കാടെത്തി .ഒരു മണിക്കൂർ വിശ്രമിച്ചു. എന്നാൽ തിരിച്ച് വീട്ടിലേക്ക് എത്താൽ ഒമ്പതര മണിക്കൂർ വേണ്ടി വന്നു. പാലക്കാട്ടെ ഉച്ചസമയത്തെ റൈഡ് എന്നെ കുറച്ച് ക്ഷീണിപ്പിച്ചു. കൂടുതൽ വിശ്രമവും വേണ്ടി വന്നു .പ്ലാൻ ചെയ്ത റൂട്ട്‌ മാറ്റിയതിനാൽ പാലക്കാട് ഒറ്റപ്പാലം റോഡിൽ അത്യാവശ്യം കയറ്റങ്ങൾ ചവിട്ടി കയറ്റേണ്ടി വന്നു. പിന്നീട് കവളപ്പാറയിൽ നിന്ന് ഷൊർണ്ണൂർ വഴി തിരിഞ്ഞപ്പോൾ അടുത്ത പണി .നല്ല മഴക്കാറ് ഷൊർണ്ണൂർ എത്തിയതോടെ കനത്ത മഴയും തുടങ്ങി. കുറച്ച് സമയം മഴ മാറാൻ കാത്തു നിന്നെങ്കിലും, അടുത്തൊന്നും മാറുന്ന ലക്ഷണമില്ല. മൊബൈൽ കവറിലാക്കി ബാഗിൽ ഇട്ടു.പിന്നീട് ഒന്നും നോക്കാതെ കുന്നംകുളത്തേക്ക്  ആഞ്ഞു ചവിട്ടി. വീടെത്തുന്നതു വരെ നാൽപതു കിലോമീറ്ററിനടത്തു മഴ ആസ്വദിച്ചു ചവിട്ടി.

കൃത്യമായ പരിശീലനം മാത്രം പോര! വ്യക്തമായ പ്ലാൻ കൂടെ ഉണ്ടെങ്കിൽ ദൂരങ്ങളൊന്നും  ഒരു വിഷയവും ഇല്ല.

കഴിഞ്ഞ മാസം നടത്തിയ ഇതു  പോലുള്ള യാത്രകൾ  ഇനിയെന്നാവോ!